بحب الحكومة وادعى علينا

تخرب بيوتنا وتِكسر عنينا

لو مره قولنا خبايا الضمير

تنطورنا حتما تقول اختفينا

بحب الحكومه و غاوي الطابــور
باهمل فى شغــلى و أرضى تبور
هواية وقوفى مش نقص حـــاجه
ما أسعد وصولك يا عبد الصبور

بحب الحكومه تبيع المصانع

لأى خواجه مجرم و صــايع
القصـد راحتى م الشغـل كله

و يبقـى علينا فرك الاصـابع

حب أعمى بفعل فاعل

بحب الحكومه مهما تلمـونى
حب الحكومه دا منبع جنونى

لو بس تمشى هاعـيط عليها

و ان شالله تمشى لو كذبونى

بحـب الحكومه و مالك يا بايخ؟

مرقع هدومـى من جوعى دايخ

عاطل ومفلس وخايف و جاهل

مستنى رضاها كفتوى المشايخ

تحذير... و إلا...! انتم عارفين

بحب الحكومه و احب الى منها

ودينى و دينى فى الاصل دينها

و أزعل و أعيــط زى العيـــال

لو حد فيكــم حــــاول يدينــــها

بحب الحكومه وعايش عشانها

أموت.. أضحى لو فعل شانها

و اعادى الاشقة و كـل المشقة

و ما سألها ليه ما الأمر شانها

أول الحب عضة

بحب الحكومه وطالب الحلال

طول عمرى قاعد بهز الهلال

و استنـــى بكره يجيـب الفرح

تقولى انتظارك رسومه بريال

نفسيتك أهم بلاها عيش

بحب الحكومه و حبى "النظيـف"

ولو كان فى عمـرى آخر رغيف

أفديه ببيتى و غيطى وكل العيال

ويبقالنا ابتسامة وشـــه الظـريف

بحب الحكومه و مالى عزول

وأغنى فى هواها و ليل وقول

: بنت العويل ليها المفـــــازه

كل الخساره لبنت الاصـــول